2023 жылдың 13 сәуірінде М. Өтемісов атындағы Батыс Қазақстан университетінде «Ғалым-методолог, профессор Әлия Мұханбетжанованың ғылыми мектебінің мұрасы және педагогика ғылымының даму перспективалары» тақырыбында халықаралық ғылыми семинар өткізілді.
Ғылыми семинардың жұмысына Польша, Ресей елдерінен ғалымдар, Қазақстанның Х. Досмұхамедов атындағы Атырау, М.Өтемісов атындағы Батыс Қазақстан, Батыс Қазақстан инновациялық-технологиялық университеттерінің профессор-оқытушылар құрамы, ғалымның ғылыми мектебінің шәкірттері мен магистранттар қатысып, сөз сөйледі.
Семинар мақсаты: ғалым-методолог, профессор Әлия Мұханбетжанованың ғылыми мектебінің мұрасын дәріптеу, ғалымның ғылыми тағылымдамасын тарату.
Ғылыми семинарды г.ғ.к., қауымдастырылған профессор, М. Өтемісов атындағы Батыс Қазақстан университетінің ғылыми жұмыс және халықаралық байланыстар жөніндегі проректоры К.М. Ахмеденов және п.ғ.к., қауымдастырылған профессор, Х.Досмұхамедов атындағы Атырау университетінің әлеуметтік мәселелер және жастар саясаты жөніндегі проректоры Л.Е. Койшыгулова алғы сөз сөйлеп ашты.
Ғылыми семинарда педагогика ғылымының өзекті мәселелері мен даму перспективалары талқыланды.
Семинар жұмысы барысында маңызды мәселелерді талқылау нәтижесінде келесідей резолюция қабылданды:
- «Ғалым-методолог, профессор Әлия Мұханбетжанованың ғылыми мектебінің мұрасын тарату;
- Профессор Ә.М. Мұханбетжанованың ғылыми-педагогикалық мұрасын білім алушыларға оқыту мақсатында ұрпақтар сабақтастығында жетілдіру;
- Ғалымның ғылыми мұрасымен білім алушыларға оқыту мақсатында «Кәсіби құзыреттілікті қалыптастырудың психологиялық-педагогикалық негіздері» оқу-әдістемелік кешеніне «Профессор Әлия Мұханбетжанованың ғылыми-педагогикалық мұрасы» тақырыбын енгізу, оқу процесінде іске асыру;.
- Ғалымның ғылыми мұраларындағы өзекті мәселелерді ғылыми зерттеулерге енгізу және дамыту;
- Профессор Әлия Мұханбетжанованы құрметпен еске алу шараларын дәстүрлі түрде ұйымдастыруды ғалымның ғылыми мектебінің шәкірттеріне жүктелсін.
Семинар соңында ұйымдастырушылар ғылыми семинарға қатысқан қонақтарға алғыстарын білдірді.
