5 қазан күні М.Өтемісов атындағы Батыс Қазақстан университеті, педагогика факультетінің ұйымдастыруымен "Ұстаз-ұлы тұлға" атты мерекелік шара өтті.
Мақсаты: Ұстаздың адам өмірінде алатын орыны зор екендігін, ұстаздарды құрметтеу, сыйлау және қадірлеу қасиеттерін студенттер бойына дарыту. Ұстаз мамандығының қыры мен сырларын түсіндіру. Ұстаз еңбегін әрқашан бағалай білуге тәрбиелеу.
Ең алдымен 1 курс студенттері әсем бимен оқытушылар назарын аударды. Мерекелік шараны бастап, оқытушыларымызды құттықтау үшін педагогика факультетінің деканы Ергалиева Гүлжан Алғазықызына сөз берілді.
Шара барысында ФКС-39 топ студенті Қожахметов Мирас пен ФКС-25 тобының студенті Тарих Саягүл домбырамен күй шертіп, ерекше әсер қалдырды. Бірінші курс студенттері шара қонақтарына арнап қос тілде мәнерлеп өлең оқыды. Көңіл көтеру мақсатында 1 курс студенттерінен құралған КВН командасы өнер көрсетті. Ұстаздар үшін арнайы дайындалған ойындар ойнатылды. Ойындар барысында белсенділік көрсеткен оқытушыларға сыйлықтар таратылды. Студенттер түрлі би билеп, әндер шырқады. Шара соңында барлық белсенділер бірігіп ұстаздарға ән арнады.
